ضرورتمند خلکوں کراں اک قدم یا آئی۔ پی۔ این سن 2012 کاللاں اولئیں یُوں مہ سنُویز آنس۔ اُو اک غیر سیاسی، غیرجانبدار تےغیر سرکاری اک مقامی تنظیم تُھو چہ سُو اک خاص غرض تے پروگرام ذہنہ منز دھئی سنُوئیز تُھو۔ اُو تنظیم صوبائی حُکمتی مِل ضم تُھو آں اسئیں رجسٹریشن نمبر 7361/5/134 تُھو۔ اس تنظیمئیں بُنیاد جناب طالب جان اباسندھئے څھالس چہ سو اک لک وال، اک محقق تے اک لکئیل پڑئیل سماجی کارکن تُھو چہ سو کے۔ پی۔ کے ذرعی یونیورسٹی نہ سن 1998 مہ دیہی ترقی مہ ایم فل کرئیل تُھو۔ سئیں پِشاور یونیورسٹی نہ سیاسیات مہ ایم اے ہُم کرہ څھے۔ فراغت نہ پتئیں سو حکمتی تے غیر حکمتی مختلف اداروں مِل مختلف کموں مہ دھری تُھو۔ سئیں فراغت نہ پتئیں تئیں مھینلیں زیب تے کوستئیں ثقافتی تل تحقیقی کام شروع کریلس چہ سو ہیں ہار جاری و ساری تھُو ہاں آئی۔ پی۔ این یا ضرورتمند خلکوں کراں اک قدم اس سلسلہ میں اک اہمم قدم تُھو۔
تاں قیام نہ پتئیں ائیں تنظیمے تاں اہداف تے تئیں مقاصد حاصل کرئیں کراں مختلف پندہ استعمال کرہ څھے آں مختلف خلکوں تے مُت ڜُو رنگاں تنطیموں مل رابطی جاری تھی۔
تئیں مقصدئیں طرفی تل سفر جاری رڇھے ائیں تنظیمے تاں اولاں آں بنیادی نشانہ تے مقصد حاصل کرئیں کراں لکھوں کراں تئیں زِب مہ مقامی طور تل تحقیق کرے نصاب سندے دو کالوں تعلیمی پروگرام سندیلس چہ تس تل کام شروع تُھو آں تجرباتی طور تل مواد سئی کرئیں کراں دو کالوں اک پروگرام مارچ 2014 مہ شروع کریلس چہ سو مارچ 2016 مہ ختم ہُوں ڜت۔ اس بابت منز الفارابی پبلک سکول قائیم ہُم کرہ څھے چہ تلہ لکھوں کراں تئیں مھینلیں زب مہ تعلیم دیزات۔ اگر چہ مقامی، ملکی تے بین الاقوامی طور تل مادری زب مہ تعلیماں څئ خلک خلاف تھے لیکن حقیقت ڜو تھی چہ لکھ بنیادی تعلیم تئیں مادری زب مہ ہُن کھئیں سیوں زھنئیں مڑنئیں تربیت ہُوئینت۔ تعلیمی مواد، تدریسی زیب تے ماحوال اگر بُٹ مقامی لیول تل لکھوں عمر، ذھنی حالت تے سیوں اُتھیاک بھیاکاں مطابق ہُوندے کھئیں سئیں کم وختہ مہ سُگا تعلیم حاصل کرہانتے آں سیوں ذہن ہسانی ہِن کام کرات۔ اس حقیقت سئی کرے پاکستاں آئین منز گھینروں سو وخ اس بلئیں ذکر کریلس چہ پاکستاں مہ معصوموں کراں سیوں مادری زب مہ تعلیم دئیں کراں اقدامات ہُوں ڜتے۔ الفارابی پبلک سکول (زاں اِسکُل) اس سمت مہ اک اہم قدم تُھو چہ تس ائیں تنظیمے اُڇھہ څھے۔ مادری زب مہ لکھوں کراں تعلیمئیں کامیابی تے بنیادی مقصد اک ڜو ہُم تھی چہ لکھوں کراں گشے چہ بھاں ماحول تُھو ڜُو رنگاں ماحول اِسکُلہ مہ دَیوں تے چہ لکھ اماں تل گی شاناں گرانتیا محسوس نیراں آں براداش کرہاں فرق موجود ہُوں۔
اس کام کرہانس جناب طالب جان اباسِندھی صیباں تحقیقی کمے څئی کمک کرہ څھے ہاں تس تل تمام موادوں بنیاد څھازل تھی۔ سئیں تاں تحقیقی کام سن 1998 منز شروع کریلس چہ سو ہیں ہار جاری تُھو۔ اس بابت مہ بلی منہانس سئیں مان چہ زاں کوستاں مہ لکھ معصومہ اِسکُلہ مہ داخل کیر کھئیں سئیں پریشان ہُونتے گن چہ اک وخ مہ سئیوں کراں ڇا ناشنا زِبوں (اردو، پشتو تے انگریزی) مہ تعلیمی مواد دیزات چہ تس تل قابو بُٹ لکھ نیرہانتے آں غرک لکھ اولاں کالہ مہ اِسکُل پھت کرے ڈیواتے آں ڜو وج تھی چہ کوستاں مہ اسکل پھت کرے ڈیویل لکھوں تعداد څئی زیات تھی۔ اُو بال نہ صرف کوستئیں لکھوں کراں تھی بلکہ پاکستئیں مُئیت علاقوں مہ تے ڜو شاناں پُوئیر دُنئیں اک مسلہ تھی گولہ چہ لکھوں تئیں زب مہ مواد تے تعلیم نی تُھو۔
